Komunikasyon
at Pananaliksik sa Wika at Kulturang
Pilipino
Unang Semestre, 2016-2017
Reaksyon sa:
Komunikasyon
Ayon kay Webster, ang komunikasyon ay ang akto ng
pagpapahayag ng ideya sa pamamagitan ng pasalita o pasulat na paraan. Ito ay
nangangahulugan na ang komunikasyon ay sumisimbolo sa proseso ng interaksyon sa
isang tao o higit pa. Ito ay nagagawa sa madaming paraan, pasulat, pasalita o
paggamit ng simbolo.
Bilang isang mag-aaral, aking napagtanto na ang komunikasyon
ay napakahalaga sa ating buhay. Sapagkat ito ay
isang interaksyon o uri ng pakikipagpalitan ng ideya. Halos araw-araw,
tayo ay nakikipagusap sa ibang tao at maging ang ating katawan ay nagkakaroon
rin ng komunikasyon. At mas napapabilis pa ngayon ang pakikipagkomunikasyon sa
mga tao dulot ng makabagong teknolohiya.
Ang Etnograpiya ng Komunikasyon
Ang etnograpiya ng komunikasyon ay pinasimulan ni Dell Hymes
noong 1962. Ito ay isa sa mga teoryang pandiskurso. Ang teoryang ito ay
tumutukoy sa kakayahang komunikatibo ng tagapagsalita higit sa kakayahang
gramatika ng wika na ginagamit sa diskurso. Mahalagang salik rin dito ang
pag-aangkop ng tradisyon o kultura ng taong sangkot sa diskurso.
Ayon sa aking pagkakaunawa, ang etnograpiya ng komunikasyon
ay tumutukoy sa kakayahan ng isang tao kung paano niya gagamitin ang wika sa
isang mabisang paraan. Mahalaga ring maunawaan ang kultura o tradisyon ng isang
kalahok sa diskurso. Ito ay kinakailangan upang maiwasan ang hindi pagkakaintindihan.
Larangan ng Pragmatiks
Batay sa aking pagkakaunawa, ang larangan ng pragmatiks ay
tumutukoy sa kaangkupan ng gamit ng wika sa isang partikular na sitwasyon.
Mahalagang malaman natin ang angkop na gamit ng wika upang ito ay mabigyan ng
tamang pag-unawa o kahulugan. Sa isang partikular na sitwasyon kinakailangan na
wasto ang paggamit ng wika upang ang tuloy-tuloy na daloy ng komunikasyon ay
maging angkop o naaayon at maiwasan ang maling pagkakaunawa dito. Tumutukoy din
ito sa epekto ng paggamit ng wika ng isang tao.
Pragmatiks sa Komunikasyon
Ang pragmatiks sa komunikasyon ay isang kakayahang
nagpaparating ng isang tukoy na mensahe. Sapagkat ang bawat mensahe ay may
lantad at di-lantad na kahulugan. Ang tagapagsalita ay mayroong sariling
interpretasyon at gayundin ang tagapakinig. Nangangahulugang nakabatay sa
bawat tao ang interpretasyon ng bawat
pahayag. Maaaring positibo o negatibo ang kanyang pagtanggap sa mensahe, kung
kayat nararapat na unawaing maigi ang bawat mensahe nang sa gayon ay maging
maayos ang pagkakaintindi rito.
Kakayahang Diskorsal
Ang kakayahang diskorsal batay sa aking pagkakaunawa ay isang
komponent na nagbibigay ng kakayahan na magamit ang wikang binibigkas at wikang
ginagamit sa pagsulat sa isang makabuluhang paraan. Ito ang kakayahang
nagpapalinaw ng mensahe upang ito ay mas maunawaan pa ng husto ng tagatanggap
ng mensahe. Nabibigyan din nito ng wasto at angkop na kahulugan ang isang
mensahe. Maaari din nitong palawakin o mas mapalalim ang isang kahulugan.
Teksto at Konteksto ng Diskurso
Ang teksto ay ang tawag sa nilalaman ng babasahin na ating
binabasa at nakikita sa isang diskurso. Samantala, ang konteksto ay ang uri ng
elementong nakapaloob sa teksto. Samakatuwid, ang teksto ay ang siyang ating
binabasa sa bawat pahina o pangungusap. Ito ang nagpapakita ng nillalaman ng
isang aklat o babasahin. Ang konteksto naman ang siyang nagpapahayag ng
damdamin o tumutukoy sa emosyon na nais ipabatid o iparamdam ng isang
pangungusap at nagbibigay kahulugan sa nilalaman ng isang teksto.
Itong dalawa ay hindi maipaghihiwalay, sapagkat silang dalawa
ay magkasama sa bawat babasahin. Anumang pahayag na ipapakita ng teksto ay
bibigyan ito ng kahulugan ng konteksto. Ito ang dahilan kung bakit nagkakaroon
ng kahulugan ang bawat babasahin.
Pananaliksik
Ayon kina Manuel at Medel (1976), masasabing ang pananaliksik
ay isang proseso ng pangangalap ng impormasyon o mga datos upang malutas ang
isang partikular na suliranin sa isang syentipikong pamamaraan. Nangangahulugan
na ang pananaliksik ay isang proseso upang magkaroon ng solusyon, kasagutan at
patunay ang isang suliranin o isyu. Bilang isang mag-aaral, napakaimportante
ang pananaliksik. Hindi lamang dahil sa ito ay pagtutuklas, kundi ito rin ay
isang pamamaraan upang mapalawak pa natin ang ating kaalaman sa mga bagay na
hindi pa natin alam. Kung kaya’t itoy napakahalaga dahil ito’y lubos na
nakakatulong sa lahat.
Inihanda ni:
REYMARC JASON T.
TAMPOS, Grade 11- Falcon
Mag-aaral
Walang komento:
Mag-post ng isang Komento